សេចក្តីថ្លែងការណ៍៖ អ្នកនាំពាក្យក្រសួងការបរទេសកម្ពុជាបញ្ជាក់ជាថ្មីពីការប្តេជ្ញាចិត្តប្រយុទ្ធប្រឆាំង ឧក្រិដ្ឋកម្មឆ្លងដែនគ្រប់ទម្រង់
នៅថ្ងៃទី២៣ ខែតុលា ឆ្នាំ២០២៥ ក្រសួងការបរទេស និងសហប្រតិបត្តិការអន្តរជាតិ (MFAIC)នៃព្រះរាជាណាចក្រកម្ពុជា បានចេញផ្សាយសេចក្តីថ្លែងការណ៍មួយ ដែលអះអាងជាថ្មីអំពីការប្តេជ្ញាចិត្តដ៏មុតមាំរបស់ខ្លួន ក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ទម្រង់ ជាពិសេសការឆបោកតាមប្រព័ន្ធបច្ចេកវិទ្យា និងការជួញដូរមនុស្ស ។ រាជរដ្ឋាភិបាលកម្ពុជាបានបង្កើនប្រតិបត្តិការទូទាំងប្រទេស ដែលនាំទៅដល់ការបិទបរិវេណខុសច្បាប់ និងការជួយសង្គ្រោះជនរងគ្រោះ ដែលពួកគេតែងតែត្រូវបានគេជួញដូរ និងបង្ខិតបង្ខំ ។ វិធានការសំខាន់ៗរួមមានការពង្រឹងច្បាប់ស្តីពីឧក្រិដ្ឋកម្មតាមប្រព័ន្ធបច្ចេកវិទ្យា ការដកហូតអាជ្ញាប័ណ្ណអាជីវកម្ម និងការបង្កើតក្រុមការងារបង្ក្រាបឧក្រិដ្ឋកម្មតាមប្រព័ន្ធបច្ចេកវិទ្យាថ្នាក់ជាតិនាពេលអនាគត ។
កម្ពុជាកំពុងពង្រឹងកិច្ចសហប្រតិបត្តិការអន្តរជាតិជាមួយដៃគូដូចជា សាធារណរដ្ឋកូរ៉េ ចិន និងរដ្ឋជាសមាជិកអាស៊ាន ។ បន្ទាប់ពីឧបទ្ទវហេតុដ៏សោកនាដកម្មដែលពាក់ព័ន្ធនឹងពលរដ្ឋកូរ៉េនាពេលថ្មីៗនេះ កិច្ចប្រជុំថ្នាក់ដឹកនាំមួយបានអះអាងជាថ្មីនូវការប្តេជ្ញាចិត្តរួមគ្នាក្នុងការដោះស្រាយបទឧក្រិដ្ឋទាំងនេះជាលក្ខណៈទ្វេភាគី ដោយផ្អែកលើការគោរពគ្នា សមភាព និងការជឿទុកចិត្ត ។
កម្ពុជាបានសង្កត់ធ្ងន់ថា «ខណៈដែលឧក្រិដ្ឋជនយកបច្ចេកវិទ្យា និងព្រំដែនជាឈ្នាន់ វិធានការឆ្លើយតបរបស់យើងប្រឆាំងនឹងឧក្រិដ្ឋកម្មទាំងនេះ ចាំបាច់ក៏ត្រូវធ្វើឡើងដូចគ្នា ក្រោមកិច្ចសហការ និងការសម្របសម្រួល»។ តាមរយៈកិច្ចសហប្រតិបត្តិការ មិនមែនការស្តីបន្ទោស ព្រះរាជាណាចក្រកម្ពុជានឹងបន្តស្វែងរកឧក្រិដ្ឋជន ការពារនិងសង្គ្រោះជនរងគ្រោះ ព្រមទាំងរក្សាសុខសុវត្ថិភាព សណ្តាប់ធ្នាប់សង្គម និងសេចក្តីថ្លៃថ្នូររបស់មនុស្សគ្រប់ៗគ្នា។
ក្រសួងការបរទេស និងសហប្រតិបត្តិការអន្តរជាតិ
